This post is also available in: English, Russian
Հարցազրույցին պատրաստվելու առաջին քայլ. տեղեկացված լինել այն կազմակերպության մասին, որտեղ գնում եք հարցազրույցի:
Արդյունավետ ինֆորմացիա կարելի է ձեռք բերել տարբեր աղբյուրներից: Ամենահասանելի միջոցը կազմակերպության կայքին ծանոթանալն է: Փորձեք ամսագրերում գտնել հոդվածներ տվյալ կազմակերպության վերաբերյալ: Գուցե Ձեր հարցերից մի քանիսին կարողանա պատասխանել այն կադրային կենտրոնի աշխատակիցը, որին դուք դիմել եք:
Ինչն է կարևոր իմանալ այն կազմակերպության մասին, որտեղ Դուք գնալու եք հարցազրույցի.
- Ինչ արտադրանք է ներկայացնում կամ ինչ ծառայություն է մատուցում այդ կազմակերպւթյունը,
- Ով է հանդիսանում կազմակերպության արտադրանքի կամ ծառայության ուղղակի սպառողը,
- Ինչպես է ստեղծվել կազմակերպությունը, նրա նպատակներն ու ձեռքբերումները,
- Արդյոք կազմակերպությունն ունի տարածաշրջանային նշանակություն,
- Ովքեր են կազմակերպության հիմնական մրցակիցները,
- Արդյոք այն համարվում է ազդեցիկ կազմակերպությունը,
- Ինչպես է արձագանքում մամուլը կազմակերպության մասին,
- Ինչ հեռանկարներ կան:
Հարցազրույցին պատրաստվելու երկրորդ քայլ. մտածել այն հարցերի շուրջ, որոնք կարող են տալ հարցազրույցի ժամանակ: Որոշ հարցեր կարող են լինել զուտ գործնական բնույթի, որոշ հարցեր էլ կարող են տրվել Ձեր մոտիվացիան, հետաքրքրությունների շրջանակը,մասնագիտական կոմպետենտությունը, ընկերության և արտադրանքի մասին տեղեկացվածությունը, արագ որոշումներ կայացնելու կարողությունը ստուգելու համար:
Նախքան հարցազրույցի գնալը որոշեք, թե ինչպես պետք է հագնվեք, քանի որ արտաքին տեսքն ու վարվելակերպը շատ մեծ նշանակություն ունեն առաջին հանդիպման ժամանակ:
Նախորոք ճշտեք, թե ուր պետք է գնաք հարցազրույցի: Հարցազրույցին ներկայացեք նշանակված ժամից 15 րոպե շուտ: Դրանով Դուք ցույց կտաք, որ հարգում եք հարցազրուցավարին և գնահատում եք նրա ժամանակը: Եթե, այնուամենայնիվ, ուշանում եք, անպայման տեղեկացրեք Ձեր ուշացման մասին: Ցանկալի է Ձեզ հետ վերցնեք Ձեր երաշխավորագրերը, եթե դրանք կան:
Հիշեք, որ նույն որակավորմամբ թեկնածուների ընտրության ժամանակ մեծ նշանակություն ունի հարցազրույցի ժամանակ լավ տպավորություն թողնելու Ձեր կարողությունը:
